MAFETAHA

ESPACE MULTIMEDIA ILE DE LA REUNION

Auteurs Océan Indien

Mafétaha.

In mazinasyon si manyèr déport mon zansèt

Nou lé dann zané 1820 konmsala . Mafétaha in zinn Makwa. Na in zour la soufrans la tonm si tout in vilaz , plito in nwit. Dann la kaz torsi in ronn lo zom la rant san konyé , la tapé , la anséné , kinm in rézistans zot la doné par sirpriz zot té fine èt anséné .Mafétaha té bouz , té vir , té savir , li lavé bo débaté , koud fwèt dann do dann koko , li té koné pa , li té koné pi kèl koté té sort. La soufrans la tonm si in zinn garson , in famy , si in vilaz .

Bé kosa

, bé kisa so boug blan i tap ali dann koko ? Li pi li san mové , sa lo dyab , bé kosa ilé . Mafétaha la pa aksèpté li la débat , li té mord dann la sèr minm , té désir . Kan li té san son min si in figir li té anfons sanm la raz son zong dann zyé . e li té antann lo boug li la fé sa kriyé , kriyé minm , mé arla koud kros té i arkas son tèt. Lo kou li la ginyé , kinm li té sèy eskivé , arla pa banna la sot si li an takon , parèy té vé toufé . In not koud kros si la tanp. Son vi la défilé sou son zyé. Tout té nwar......... Mafétaha , zinn Makwa , bé kosa twé la fé bondyé ?

Mafétaha po ni fou .

Li lèv , li lé tourni , anséné , antravé , alonzé si lo do ant dé boug . Té fénwar . Mové lodèr té lèv . Boug té kri. Ninpé té i pri .Ninpé té vomi, gro vomi ti vomi , té vomi. Mafétaha li minm son léstoma té kouvèr sanm son vomi. Son kor té po soufèr lo kou li la ginyé. Mé sat té fé pli mal mal minm, sé lo fèr rouz la mèt ali an plin milyé son zépol . Li la san lokor bann gro ra tous son zou, , é lo mizo ronif son bous. Anrazé, li la tord ali an minm tan li té sèy tourn ali dann tout lé sans po tir lo fèr té anmar son pwanyé é son sovi. Toudswit sat té anmaré sanm li la kriyé é la sakadé.

Anrazé Mafétaha

la sèy rodrès ali din kou mé son , mé son tèt la kony kont dobwa. Din kou son vwazin èl li la komans komans kony azot koud bréalsé lo fèr , aprésa lé dé la tonbé , fatigé , épwizé. Mafétaha la arginy in likid amèr té i sort , li la lès koulé dann kwin son bous é li té swèt la mor. Li té konprann pa kosa lariv ali. La kalmé po akouté . Li la fors ali akout dann fénwar bann kri sanm bann zémisman navé dann fénwar , bann kri èk bann zémisman navé otor dli.

Dann fénwar ,

lavé inta d-moun. Inpé té dèryèr li , inpé dovanli .Navé té lwin , navé té akoté . Mé tout té dann minm kal. Kan li té akout myé , li té komans rokonèt bann langaz té koz otour d-li . Na inn té i koz an zarab :<< O allah , èd amwin!>>. Mé Mafétaha té antann sirtou bann Bantou , sirtou Makwa. Na inpé té i vé la mor po bann blan. Na dot vwa , té tro an pléré po ké Mafétaha té rokonèt lo langaz.

Mafétaha la rann ali kont

ké li té po sas in pansé : sété kabiné . Mé fé finalman inposib, la pa giny tyinbo pli lontan, é li la san dsann ant son fès kaka li la pa giny tyinbo.In santiman révolt plis dégou sanm in santiman la ont la pran li. Son prop lodèr la maye sanm lo pyantèr lavé déza .son kèr la soulévé , la vomi ankor inpé likid, mé bann vomisman té kontinyé touzour. Mafétaha zinn Makwa , kosa ou la fé bondyé? li la maziné .Li la dmann Allah éklèr ali:kèl pésé li la fé? osa ilé son famy? Li la désid pryé , mé osa ilé lo nor-ès , li té koné pa . Li té pa kapab tonm aznou . Li la fèrm son zyé li la domann Allah pardon. Epila in bon bout lo tan son kor la pi bouzé ditou , aforstan tro la soufrans . Li la fini konprann so bann soufrans té trinn amar son léstoma. Li té pankor manz riyin dopi lo finn nwit son kaptir. Li té trann sèy war si li té fine dormi dopi so tan la . Toudinkou li la rapèl in rèv li té trann fé kan so nwit in dézord , in doulèr la lèv ali é ké li la vi in boug nwar èk blan sanm zot gran sové zonn la kaptir ali sanm son famy .Bé ousa ilé son famy ? Mafétaha la rouv son zyé d-in kou sèk! Li biny dann transpirasyon , son kèr té trann afolé . Li la andor ali san rann ali kont . Sa in kosmar , in réalité ..... Soubou-Georges 1993-2009.