Kanal kiltirel rénioné
(Tradiksyon par RoseMay Nicole (vo) D' après un témoignage d'esclave paru dans le journal de l'unesco d'octobre 1994 : Le récit de Moses Grandy , esclave en Caroline du Nord, Traduction de Jean Bemoist . Centre de recherches Caraîbes , Fonds Saint Jacques Sainte Marie Martinique , Université de Montréal , 1977. Mi apèl Moses Grandy. Moin lé né dann Comté de Camden Caroline du nord . Mi kroi moin na sinkantsizan ... Mi rapèl zis mon kat sèr èk mon kat frèr.Mon momon la fé ankor dot zanfan solman mi gingn pa rapèl azot akoz moin té tro pti ; zot lé fini mor sinonsa lavé vann azot avan . Moin té plipti zanfan .....
La fanm lo mètla défann ali vann amoin alor li la vann innot ti garçon .Té mon ti frère .Mon momon la kaziman pèrd la tèt èk la soufrans , èl la rod défann azot vann son zanfan: polapinn zot la tap aèl la bat aèl a tèr . El la pèrd konésans , aprésa kan èl la rouv son zié son ti garson té pi la. Mon momon la mèt aèl a kri lasasin ; Akoz sa minm lo mèt la amar aèl si in pièdpès po fouèt aèl .... Rant mon zèn mèt èk moin lavé zis dé zour diférans .Nou dé li té abitié zoué tou lé dé ansanm. Mon vié mèt té i di toultan li va donn a moin son garson . Kan li lé mor,moin la tonm son bien .
Li té apèl James Grandy ... Lèrk moin la gingn vintéinnan lo mèt la loué amoin . An promié té mesié Kemp . Li la pa maltrèt amoin , la donn amoin linz , manzé, tout konm i falé . Lo dézièm mèt té lo vié Jemmy Coates , in bononm mésan. Navé inn foi li la fé mèt amoin touni po li gingn koutfouèt amoin akoz moin té pa kapab apran son manir mèt le grin mayi dann trou. Lo fouèt té tayé dann in bout do boi ki fémal , té i antour mon rin asak kou aprésa li la kas dan mon vant. Moin la rann amoin kont desa aprésolman kank moin la artourn travay. Lèrk moin la rogard mon vant ousa té i fé vréman mal , moin la vi lo morso dfouèt point anlèr. Moin la aras ali , lo san la pisé. Aprésa lo boubou la abouti , lopi té i koul anndan. La fé mal amoin in bon pédtan ankor... Benjamin mon frèr la artourn isi. Li té i sort o Zantiy... ali , son fanm , amoin , nou té po asiz ansanm kank lo fanm son mèt la ni dir ali alé trap in séodlo po èl .
Mon frèr la parti épi li la port lo séodlo dann magasin. Astèr li té i amiz vréman pou rovnir , moin té po komans domann amoin po koué té i fo ali toustan-la kank moin la antann in gro koudmarto. Sa la trakas amoin , moin la kour vitman po ésèy konprann sak larivé. Moin la rogard dan lo magazin , la moin la vi mon frèr alonzé atèr vant anlèr. Moin la vi mesié Williams ( li lavé asté mon frèr ) té po mèt son dé min èk son dé pié dann détroi zano an fèr ; aprésa li la mèt in gran bardfèr antravèr si son léstoma èkdé zano po ténir lo bar. Moin la domann kosa li lavé fé . La di amoin konmsa mon frèr la pa fé rien ,solman son mèt lavé fé fayt , alor té fo vann ali po pay sak son mèt té i doi . Mon frèr la rèst angaroté konmsa tout inn niut. Lannmin la aminn ali la zol . Amoin dopi so zour-la moin la zamé rovi mon frèr....
1. Amoin minm pié-narsis dan la plèn,
Amoin pié-d'lis borldlo
2.Parèye in-pié d'lis i fléri dann karo pikan blan,
ala mon veli dan lo ta tout zènfi.
3.Parèye in pié-pome dann milié la savane zépinar,
ala mon zézèr dan lo ta tout zènzan.
4. Li la fé rant amoin dan la kaz de-vin ;
Drapo li rouvèr anlèr desi moin i apèl: lamour.
5. Donn amoin gato rézin pou souténir mon kor,
Donn ponm po rafrésir amoin , pars lamour i fé mal .
6. Fé k son min gos i pas dosou mon tèt ,
fé k son bra droit i antour amoin !
7. Mi sipli azot , fi zérizalèm ,
desi la tèt bann gazél , desi lo vant bann sèrf,
fé pa lèv mon lémé ,kas pa somèye mon lémé , avan k èl la anvi;.
( tiré dann magazine nout lang 2 niméro ( vo )
PLI GRAN TOUT BANN KANTIK
Tradiksion Axel Gauvin
1 Desi mon li , nuit si nuit ,
moin la rod lo boug k mon kèr i inm ;
Moin la rodé moin la pa trouvé ....
2 Alors m'a lévé , ma fé lo tour la vil .
Dan tout ri desi tout plas ,
ma rod lo boug k mon kèr i inm .
Moin la rodé moin la pa trouvé .
3 Moin la bit si gard polis po fé la ronn dan la vil :
" Zot la pa vi lo boug mon kèr i inm " ?
4 Pasito fine Désot bann'na ,
moin la trouv mon lémé ;
Moin l'anbrat ali , mi larg arpi li ziskatan
m'a fé rant ali dan la kaz mon manman ,
dan la sanm la fanm la donn amoin la vi .
5 Mi sipli azot , fi zérizalinm ,
desi la tèt bann gazèl , desi lo vant bann sèrf ,
fé pa lèv mon lémé , kas pa somèye mon lémé
avan k èl la anvi .
6 Kosa i sort dann dézér
parèy kolone la fimé ,
dann in vapèr la limir , lansan
dan in niaz tout sanbon parfimèr?
7 Sa mansi lo roi salomon
toutotour : soisant vayan gèryé
soizi rant lo pli vayan Israèl .
8 Tout lé antréné po po konba.
tout lé armé ,lépé par koté .
tout lé paré po anpar latak de nuit.
9 Lo roi Salomon la fé fèr son mansi an boi d'Liban .
10 Lo kolone t'an arzan ,
Lo dosié t'an or
l'asir t'an pourp ;
Bann fi Zérizalinm la brod lo dodan par amour
11 Sort dan zot kaz, zanfan Sion vien azot
Rogar lo roi Salomon .
Rogard la kourone son manman la kourone ali ansanm lo zour son maryaz
Lo zour la zoi la ranpli son kèr
( tiré dann magazine nout lang 2 niméro )
Soubou-Georges 1993-2003.
Réseaux SOUBOU GEORGES Ile de la Réunion tous droits réservés. Réalisation Georges Soubou pour kreoler